Tasabuik Buya Sedan urang santiang. Biya lah baumua kapalo lapan, nan inyo tatap tapandang di nagari. Karano barasa dari kampuang karamat, Buya diaragoi bana dek Mak Inggih. Saketek ka buya. Saketek ka buya. Takah tu bana Mak Inggih mamulie an Buya Sedan.

Apo sajo nan disabuik Buya Sedan dipacik bana dek Mak Inggih. Kadang nan disampaian Buya tu, buah pasanan Mak Inggih juwo. Takah ko lah caro Mak Inggih manggaleme urang kampuang nan dipimpinnyo.

Sakali wukatu, patang Salasa pakan nan lapeh, di lapau Mak Karani, urang basoal jawek masalah si Pekok. Sato barundiang urang ampek jinih: pangulu, manti, mualim, dubalang. Sato pulo urang jinih nan ampek: imam, khatib, bila , langkok jo kadi.

Mangecek baradu santiang, sasuai ilemu surang surang. Mak Karani nan punyo kadai, pandai bana maopor bola. Kutiko bola tibo di kaki Buya Sedan, langsuang nyo sipak kareh, malantun ka langik ijau.

"Indak ado gai si Pekok basalah doh. Waden tawu bana jo baso tambo ko mah," takah tu bana Buya mampatagak Pekok nan disabuik anak surau salah mambaco tambo.

"Ijan tarabo bana Buya. Tanang tanang sajolah Buya. Kasapakatan niniak mamak lah mamutuih baso si Pekok salah mambaco tambo," kecek Malanca manyolang Buya nan dalam kodak nampak dek urang makan sameja jo Pekok.

"Awak ko jan bapikia sampik. Kalian mudo matah baru. Ijan asa kamanuduah sajo. Waden tawu bana Pekok tu ndak sangajo. Waden taho apo dimaa banang sirah tambo tu. Biya ndak niniak mamak bana waden, pokoknyo jo tambo waden ngarati," jawek Buya takah urang dareh.

"Duduaklah Buya dulu. Minunlah aia dingin ko lu ha. Buya lah pamaneh kini se mah," umbuak Malanca maso tu, mananangan Buya nan takah urang tabik suga.

Samantaro Buya mairuik aia minun dalam tekoang ketek, Malanca cubo mangecek baliak. Kato Malanca, kito sarahan sajolah ka cadiak pandai. Biyalah inyo manantuan si Pekok basalah, indak basalahnyo.

"Ambo dapek curito, Buya cuma sikola umun takah sikola caro Ulando saisuak. Kok sikola tambo ko yo ka rumah gadang baduduak an bana jo niniak mamak nan gadang basa batuah. Jadi satantang Pekok, ancak Buya anok anok sajolah," bujuak Malanca kutiko ka bapisah.

Curito di lapau Mak Karani di kampuang jawo tu, sampai ka talingo Mak Uniang di lapau simpang. Sanjo tadi manjalang sumbayang mugarik, Mak Uniang maimbau Malanca."Takah ko mah Malanca, satantang Pekok, kan lah basuluah matoari, bagalanggang mato rang banyak. Tuu mah, urang cadiak pandai lah manyato an inyo salah. Sudah ko. Kok sobok waang jo Buya Sedan, toloang sampai an salam waden yo. Waden salut jo baliau tu. Picayo dirinyo tenggi," pasan Mak Uniang.

Malanca nampak maangguak balam. "Alah koh tahu Buya ko, baso cadiak pandai nagari ndak sapandapek jo inyo," bisiak Malanca di balakang Mak Uniang...


 
Top