Satiok Mak Uniang payi rapek kalua daerah urusan karajo, urang manyuruah baliau jadi imam sumbayang bajamaah. Sakali wukatu di Yogya, shaf mugarik lah panuah nan kajadi imam alun tibo. Ado surang nan basuaro, "Orang Padang siapa, ayo maju jadi imam." Ba itu bana tuah jadi urang awak di nagari urang.
Sakali wukatu maso Mak Uniang jadi urang surek kaba, di awa tahun sambilanpuluhan, mangecek jo urang Bugih Makasar. Kato baliau di kampuangnyo saisuak, kok ado kamatian, untuak mamandian, mangapani mayik, sampai malapeh jo duwah salamat, imbau sajo urang Padang.
Asa tasabuik urang Padang, kecek kawan dari Makasar ko, pasti urangnyo siak, pandai baugamo. Caro manyarinyo murah sajo. Caliak sajo laki laki manggaleh di pasa nan mamakai kupiyah hitam. Sapo sajolah kok ka batanyo mintak toloang masalah ugamo.
Ruponyo namo baiak urang awak di tanah Sulawesi tu, diukia dek babarapo urang pangulu maso sausuak. Antaronyo Datuak Ripatimang, Datuak Ripari, Datuak Ri Tiro. Baitu urang Bugih Makasar manyabuik tigo urang pangulu nan maanta ugamo Islam ka kampuangnyo.
Manuruik kaba nan dijawek, urang Minang nan payi ka Sulawesi tu, banamo Katik Tungga bagala Datuak Makmur, urang Sulawesi manyabuik Datuk Ribandang. Katik Suluang bagala Datuak Sulaiman disabuik di Sulawesi Datuak Patimang. Ungku Nurdin Ariyani bagala Katik Bungsu disabuiknyo Datuak Ri Tiro.
Satantang Datuak Patimang juwo tasabuik dek urang Bima Nusa Tenggara Barat. Baliau maanta ugamo Islam ka sinan. Ado pulo Abdullah Raqie bagala Datuak Karamah basamo jo Ungku Mangaji. Baliau ka Palu, Bulukumba sampai ka Gorontalo jo Maluku. Datuak Putiah, Kalano Basa sampai ka Sulu jo Philipina.
Namo namo urang awak tu diukia jo tinta ameh dek urang tampatan. Sarupo di Palu ado IAIN Datuk Karamah. Di Bulukumba ado Islamic Center Datuk Tiro. Malah di Manila ibukota Philipina ado Musajik Datuk Putih.
Carito ko disampaian Mak Uniang ka Malanca sudah sumbayang subuah di Musajik Tawakal, pagi tadi.
"Jadi waang nan ka iduik lamo, usahoanlah banamo baik takah baliau baliau tu," kecek Mak Uniang manasihati Malanca.
"Tantu bagala datuak pulo waden dulu Mak Uniang, supayo hebat takah urang urang tu," tanyo Malanca.
"Tabaliak waang mah. Jadi urang hebat waang dulu, baru bagala datuak," baleh Mak Uniang.
Malanca paniang....