Takana maso ketek dulu, di kampuang, patangan tahun tujuahpuluhan, Mak Uniang takuik bana jo carito tukang karek kapalo. Karano tu Mak Uniang, ndak amuah main surang, apo layi  jauah jauah dari rumah.

Kawan samo gadang jo Mak Uniang ba itu pulo. Ndak buliah dek amak jo apaknyo main surang surang. Sabab, kalau main surang, beko tibo urang tukang karek kapalo. Kapalo wak dipotoangnyo untuak bata mambuek jambatan.

Maso tu, anak anak kok main bakalompok kalompok, sasamo gadang. Bagai bagai kagiatan di buek pulang sikola. Kadang bungkuih nasi bagubalo. Kadang baok bareh batanak di parak. Kadang manimbo banda, baka ikan. Kadang maabuih ubi di dangau tapi sawah. Kasadonyo tu  dibuek basamo samo.

Sanjo hari, main bola jo limau gadang. Main lang alang di tanah lapang. Ado basipak rago di jalan gadang. Tamasuak induak induak, anak padusi main kasti sasamo inyo. Basudahi jo manjapuik aia basamo samo jo embe ka sumua tapi banda.

Kutiko malam ka lalok di surau, ba itu juwo. Kok ado nan manyabuik litak takana nasi, kawan ko ka dapua maresek tungku. Nan lain sato pulo mancari lado garam gulai. Ado nan tangka tangka tangguang, antah di maa inyo dapek, antah ba a caronyo manjalo, nan jaleh inyo lah mambao ikan. Pokoknyo  ka lalok tu sado anggota, lah kanyang makan barapak.

Kini lah tibo di zaman now, baru Mak Uniang tahu mukasuik urang tuo tuo maso dulu.  Manakuti jo curito urang tukang karek kapalo. Aratinyo, awak ndak buliah bajalan surang. Sabab bajalang surang tu acok sasek. Ndak buliah makan surang. Biasonyo makan surang tu tacakiak.  Ndak buliah main surang. Biasonyo main surang  tu acok kalah.

Hiduik tu musti bakalompok. Bajamaah kecek urang siak.  Sumbayang bajamaah, gadang pahalonyo. Duopuluah tujuah kali lipek. Manggaleh bajamaah gadang kauntungannyo,  pokok wak  jadi banyak. Bakarajo bajamaah capek salasainyo, tanago balipek gando.

Sajarah juwo mambuktian takah itu. Kutiko malawan Bulando surang surang, murah sajo panjajah mamatahan sarangan nan dibuek. Kutiko lah basamo samo malawan  Sitinggih mancuang iduang, mako sakutu jo Inggirih bagai bisa angkek kaki. Apo lai si Japang nan kenek randah. Sakali ambuih, tabang.

"Itulah gunonyo baiyo batido. Barek sapikua, ringan sajinjiang. Saciok bak ayam, sadanciang bak basi," kecek Mak Uniang manyambuang curito ka Malanca sudah sumbayang subuah pagi tadi.

Malanca manyolo, "Kapatang ko Simancuang mausia cadiak pandai nan taromat di pulau, ba a tu Mak?"

"Mangkonyo main tu jan jauah jauah. Ijan pulo surang surang, beko sobok jo  tukang karek kapalo," jawek Mak Uniang.

Malanca bapikia, apo mukasuik Amak kow........"Atau iko nan tukang karek kapalo tu," bisiak Malanca samo surang...
 
Top