Disangko paneh sampai patang, kironyo ujan tangah hari. Baitu lah nasip si Pekok kamanakan Mak Inggih, anak samang Etek Baya. Manuruik curito Mak Uniang di lapau simpang, kutiko maso bagolak dulu, si Pekok kalah batandiang main catua harimau.

Samulo Etek Baya baharok bana Pekok manang. Karano tu Mak Inggih nan jadi kapalo kampuang diasuang untuak mandukuang. Ruponyo manyipak coki di babak. Babaliak awa panabangan, Pekok takongkang.

ilustrasi foto google
Basabab, Pekok ka kalah, curito Mak Uniang, karano ulah muncuang cipeh inyo juwo. Dahulu lah saelok eloknyo Pekok ko dek urang kampuang. Banyak juwo urang sayang ka inyo. Satiok main inyo diagiah manang.

Sakali wukatu, Pekok talompek kato. "Indak ado nan bisa mangalahan waden main di nagari ko doh. Induak samang waden urang kayo. Mamak waden kapalo kampuang. Waden pasti manang main catua di nagari ko," kecek Pekok mahantak maajan tuah di muko urang rami, tamasuak Inyiak Labai.

Ndak sakadar itu sajo doh, Pekok juwo mahariak hariak, manggaretak Inyiak Labai jo suaro kareh.

Kaba Pekok mangato-ngatoi Inyiak ko, bateba di nagari. Mako, sajak itu, banyak anak nagari banci ka Pekok. Inyo dicarian lawan tandiang nan diateh saranting kapandaiannyo. Supayo Pekok kalah.

Kutiko mandapek lawan barek ko, Pekok mulai ilang aka. Inyo tambah panik karano nan manonton banyak baduwah supayo Pekok tambin.

Ndak dapek malawan Pekok dibuek kawan tu. Satiok digarik, buah mati. Lah bamacam caro dilakukan. Babagai teori dipabuek. Tatap sajo tasumbek palangkahan. Akianyo, Pekok manyarah manjalang sanjo.

Bungo rampai jo kambang tujuah rupo lah tapasan. Mukasuik hati, jikok jadi Pekok manang, inyo langsuang diangkek gala tuanku. Dimandikan jo bungo tujuah tangkai.

Tapi, ba a lah, ka manyabuik. Indak dapek sarampang padi, batuang dibalah ka paragu. Indak lah dapek sakahandak hati, kahandak Tuhan juwo nan balaku. Daripado bungo tabuang pacuma, rancaklah di kaka di balai adat. Kok lai ka harum juwo namo Pekok.

Ateh parintah induak samang, mako batebakan lah kambang tujuah rupo tu di balai balai. Kapa ubek hati nan luko, disabuik an ka Pekok, bahaso ikolah tando cinto anak nagari ka bakeh dirinyo.

"Bilo bayia pitih bungo ko Tek?" tanyo amak nan manggaleh bungo ka Induak samang Pekok.

"Jamua sajolah lah dulu. Nan paralu kawu katoan ka urang urang, bungo ko dipasan anak nagari nan sayang ka Pekok yo," jawek Etek Baya jo suaro parau, sambia manyeka aia mato jo ujuang langan baju.

Takalo Mak Uniang maulang curito ko di lapau simpang, sudah sumbayang asa Raba ah kapatang, macam macam analisa urang tantang Pekok. Tamasuak Malanca, manarawang.

"Ibo wak Pekok. Lah takah anak anak inyo," bisiak Malanca sambia taruih mandanga curito Mak Uniang...
 
Top