Satiok kali maagiah wirik pangajian, Ungku Malin, taruih mambaco kisah kisah iduik urang tadahulu. Mulai sajak jaman Nabi Adam sampai maso hukum lah padam di suatu nagari.

Kisah curito nan disampai an Ungku Malin ko, diinok dimanuang bana dek Malanca nan rajin manyimak wirik baliau.

Kapatangko, sudah mugarik Ungku Malin mancurito an, takalo maso dahulu ado sabuah kota nan dihuni dek Kaum Samud samaso Nabi Saleh. Ado maso tu sambilan urang laki laki di dalam kota nan tasabuik urang bakuaso, mungkin dek kayo. Urang urang ko, nak manguasoi saluruh isi kota tu. Ka inyo pabuek kota tu sakahandak hatinyo.

Urang sambilan ko karajonyo mambuek riba. Sainggo urang rami nan kurang iman banyak bautang riba ka inyo. Adolo nan usahonyo mambuek doso gadang, manyadio an tampek maksiat. Pokoknyo pandeka sambilan ko kumpulan urang urang nan ndak taat kapado Allah Ta'ala.

"As-Saddi meriwayatkan dari Abu Malik, dari Ibnu Abbas, baso namo kasambilan urang laki laki tu adolah: Da'ma, Da'im, Harma, Harim, Da-ab, Sawab, Riyab, Mista', dan Qaddar ibnu Salif, nan mambantai unto Nabi Saleh," kecek Ungku Malin.

'Dan adolah di kota tu, sambilan urang laki laki nan suko mambuek karusakan di muko bumi, jo caro malakukan pabuatan pabuatan maksiat, di antaronyo mareko mamparanak an pitih dirham jadi riba. Mareko indak babuek kabaikan, ndak pulo malakukan kataatan.'

"Baitu bana bunyi dalianyo dalam kitab," kecek Ungku Malin di Musajik Tawakal nan panuah saparampek dek urang tuo jo induak induak. Ungku manarangan sambilan urang nan bakuaso di kota tu maso Kaum Samud sajaleh jalehnyo.

Kato Ungku Malin pulo, urang sambilan ko maraso tagaduah dek Nabi Saleh sarato kalompok urang siak, nan managak an ama makruf nahi mungkar. Karano tu mareko baniat nak manyarang kalompok urang siak tu di malam hari.

"Kito sarang mandadak kaluarga inyo tu di malam hari. Kok ado nan batanyo pawarihnyo, tantang sia nan babuek, kito kecek an an baso kito ndak ado mancaliak pambantaian kaluarganyo tu. Sasungguahnyo kito tamasuak urang urang nan bana," kecek Ungku Malin mangutip kitab.

Urang urang ko baniat mambunuah kalompok urang siak. Tapi, nan tajadi sabaliaknyo. Kota tu disarang angin puntiang baliuang. Sado nan tagak tabacuik dek angin. Tamasuak gaduang gaduang tampek balinduang nago sambilan tu, runtuah dihantam badai kuat. Kadai kadai nan dipaseokannyo untuak maksiat, tandeh dikirai topan.

"Mareko punyo rancana, Allah juwo punyo rancana. Mako rancana Allah Ta'ala nan balaku," urai Ungku Malin.

Adapun urang urang nan baiman, kecek Ungku Malin, pado wakatu itu indak kanai dek badai. Sabab, angin topan tu hanyo mancari rumah rumah nago sambilan sarato pangikuik pangikuiknyo nan munapiak. Sadonyo mati bagalimpangan takah taranak.

Pagi tadi sudah sumbayang Subuah, Malanca batanyo ka Mak Uniang sambia jalan pulang. "Ba a manuruik Mak Uniang tantang curito Kaum Samud nan dicuritoan Ungku Malin malam tadi, Mak?"

"Iyo, itu kisah maso Nabi Saleh, untuak jadi padoman dek kito nan iduik kamudian. Kito musti yakin baso nan batil tu tatap kalah dek nan bana," jawek Mak Uniang.

Malanca maangguak angguak, takah mulai paham.
 
Top