ilustrasi foto int
Ampek hari ampek malam. Anak surau bajalan kaki  ka balai adat.  Indak tantu ujan jo paneh. Nan paralu ba a bisa manyampaian pasan ka Mak Inggih.

Pasan nan kadisampaian nan dulu juwo. Ba a supayo  tibo di paruik indak dikampihan. Tibo di mato indak dipicingan. Ba a lo supayo pangulu bakato bana maukun adia.

Samantaro Mak Inggih sajak sapakan nan lapeh tatap maundang pucuak  adat, untuak manjalin hubungan baiak.

"Samo samo ajolah kito mauruih nagari ko. Kok gadang samo dilapah, saketek samo dicacah. Nan paralu kito nikmati, stek surang. Sagadang ko nagari, tantu musti kito saayun salangkah mauruihnyo," ba itu kato Mak Inggih ka tamu nan juwo kawan kawannyo tu.

Soal kawan-mangawan, sajak dulu  Inggih lah tamusawua. Samo jo Ungku Palo di tampek lain, adat nan dipakainyo: sia nan dakek tungku  musti dapek  angek.

Tampek nan nyaman di sadio an juragan pasti ado. Bisa di lumbuang padi, bisa dikincia, bisa dilasuang, bisa juwo di tangah di dapua atau dalam biliak rumah gadang.

Nan paralu dek kawan kawan ko, manarimo sabangkak surang tiok bulan. Sainggonyo baliau tu, ndak mikia bana lai, untuak balanjo urang rumah pakan ka pakan.

Satantang nan ciek ko, lah basuluah matoari, bagalanggang mato rang banyak. Caliak sajolah si Darun, si Saipun, nan maso dulu kareh angok, kini lah duduak kakanyangan. Sainggonyo manuruik sajo apo nan diparintah induak samang.

Kini nan jadi masalah dek Mak Inggih, ndak urang  nan kareh angok maso nan lampau. Tapi anak surau nan tasabuik  bajalan luruih bakato bana.

Jo anak surau ko, ndak bisa banyak gadele. Dek inyo duo kali duo yo ampek. Kalau si Wedo jo Pak Madi maso lalu, kanai manuruik barih jo balabeh, mako si Pekok musti takah tu pulo.

Lah duo kali urang surau manuruik Mak Inggih. Kini lah ka tigo kali. Kok alun juwo suai manuruik  adat nan biaso, tantu inyo ka datang pulo nan ka ampek kali. Bak kecek Datuak Gamuak tempo ari, sampai rayo kudo.

Kutiko kaba ko disampaian Malanca ka Mak Uniang sudah sumbayang Subuah pagi tadi, Mak Uniang nampak tapakua panjang.

"Ba a nan sabananyo Mak, lai ka taukun si Pekok takah nan dimintak anak anak surau tu?" tanyo Malanca.

"Manuruik tarawang waden, kini ko, nampaknyo si Pekok dipaliaro sambilan nago gadang. Sainggo inyo manaruah biso, labiah pado biso kawi," jawek Mak Uniang.

"Jadi, pacuma sae anak anak surau tu manuntuik tu Mak?" sasak Malanca.

"Alun sampai tarawang waden ka sinan lai Malanca. Tapi yakinlah waang, di ateh langik tu ado  langik nan labiah tenggi," jawek Mak Uniang manutuik kecek.
 
Top