Carito Rang Kampuang Di Kadai Angah

Penulis : Nofri Endri

Pagi nan cerah, Lapau Angah kadatangan tamu. Gaya parlente, pakaI jas (antah jas pinjam), rambuik jo sipatu mangkilek.

Tacengang Udin jo Atuik dan pengunjung kadai lain, tamasuk Angah nan punyo kadai. Ndak biasonyo, kadai Angah kadatangan tamu mangopi pagi di lapau ko.

Nyo perkenalkan diri ka pengunjung lapau. Sambia mangaluan kartu nama, tamu tu mangaku Caleg. Sanang hati Atuik jo Udin dan pengunjung lain dek kadatangan Caleg ko.

Atuik dan Udin sarato tamu lainnya, biaso minum kopi satangah, rokok sabatang, kini pasan teh talua jo rokok sabungkuih.
Labih 10 orang pengunjuang kadai Angah pasan teh talua jo rokok sabungkuih.
Babungo hati Angah, pagi ko bakal untuang gadang.

Caleg, sambia bacarito juo pasan teh talua jo rokok sabungkuih.
Atuik jo Udin nan biasonyo mangarasau mulai cari muko.

"Ondeh, Pak Caleg kasempatan bana mah. Baru Apak Caleg surang datang ka kadai ko," kato Atuik.

Caleg tasanyun sumbringah. Nyo pun makin samakin samangaik bacarito program jiko duduk di dewan.

"Pokoknyo, jiko Atuik, Udin, Angah dan kawan kawan sarato keluarga mamilih mbo, wak akan adokan patamuan sakali saminggu di kadai. Wak perhatian Apak sadonyo, sambia manampuang aspirasi," janji Caleg.

Mangalabuik tek talua, manggugua asok rokok mandanga carito Caleg.
Putuih sambuang rokok pangunjuang nan mandanga.
Sok serius demi teh talua dan rokok sabungkuih perai, merekapun siap mandukung Caleg ko.

Dek lah lamo bacarito, lah sampai jo tujuan, Caleg batanyo ka Angah, bara bai teh talua sagaleh dan rokok sabungkuih.
"Bara Angah,  teh talua ciek, rokok sabungkuih," tanyo Caleg ka Angah.

Takajuik Angah, mandanga Caleg baia surang. Bayangan Angah kadibaia Caleg saluruh teh talua jo rokok, hancua berantakan. Tabayang juo, teh talua Atuik, Udin dan pengunjung lain sarato rokoknya ka bahutang.
"Tigo puluh ribunyo, Pak Caleg," jawek Angah.

Caleg pun mangaluan pitih Rp50 ribu."Ambik se ndak Angah sisanyo," kato Caleg sambia minta pamisi ka Angah dan pangunjuang lain.

Taburangsang Atuik jo Udin sarato pengunjuang lain, satalah Caleg maninggaan Kadai Angah.

"Caleg kapunduang, disangko kok laI dibayia teh taluo jo rokok, wak. Kironyo malapehan untuang surang, ang," kato Atuik marabo gadang.

Udin pun ikuik, taburangsang." Caleg tumbuang mah. Wak, lah pasan taluo jo rokok dek arok perai. Aden ndak kamimiliah, ang doh. Saku bajaik jadi Caleg, lo gai," bentak Udin.

Angah pun, marabo gadang ka Atuik jo Udin dan pengunjung lainnyo." Pokoknyo, tak adoh hutang teh talua jo rokok, harus baia kontan. Ndak adoh modal den lai, kalau hutang," kicek Angah berang berang.

"Dek arok ka dibayia Caleg kapunduang ko, tapaso pambali bareh dibayian pambali teh taluo jo rokok," gerutu Atuik sambia diiringi sumpah pengunjung lain.
Previous Post Next Post