Lalok sakalok barasian. Tagamang tasintak tidua. Taampeh tangan ka lantai. Diresek tapi kain, mimpi lanyok sakatiko. Sapanjang jalan Malanca bapikia kareh, apokoh nan ka tajadi?

Dalam mimpi Malanca sobok jo Garundang anak Malinkundang. Kecek si Garundang, ayahnyo dulu tu, ndak durako bagai doh. Urang sakuliliang nan manuduah apaknyo durako. 

"Baliau dizolimi. Sado urang manunjuak bibia baliau. Sudah tu tangan apak ambo dikabek. Sampai mati tak ado nan mambela. Iko sajarah musti kito luruihan," kecek Garundang mandareh.

Malanca, tananang mandanga Garundang, nan nampak takah bayobana.

"Jadi ba a nan sabananyo Garundang? Jalehan lah ka waden, supayo bisa lo waden sampaian ka kawan kawan, " tanyo Malanca.

Si Garundang mamulai curito. "Apak ambo dulu tu payi marantau sudah sunat rasu. Inyo balayia sampai ka nagari jauah. Lamo bainduak samang ka Mak Lanin tukang buek sumbu kompor.

Labiah kurang ampek puluah tahun di nagari urang, sakali wukatu inyo pulang kampuang mambaok ambo jo amak ambo.

Tibo di halaman, nampak rumah gadang lah runtuah. Apak ambo manangih maimbau amaknyo.

Sudah tu, kalua surang padusi dalam gubuak ketek, nan lah bungkuak dimakan umua. Amak tuo tu mangaku apak ambo anaknyo. Dipaguiknyo apak ambo. Apak ambo mailak.

Apak ambo ndak mangaku urang gaek mumuak tu amaknyo. Sabab amaknyo dulu rancak ruponyo. Ba a kok kini tibo tibo urang tuo lapuak tu mangaku ngaku jadi amaknyo.

Urang gaek tu manangih mangungu ngungu. Apak ambo tatap ndak mangaku itu amaknyo. Urang gaek tu tatap sajo manggaragai. Apak ambo tabik suga. Disipaknyo amak gaek tu.

Sajak tu urang kuliliang manuduah apak ambo durako. Padohal inyo hanyo lupo, baso urang gaek tu yo bana amaknyo nan rancak dulu tu, tapi lah lapuak dimakan umua," jaleh Garundang badalia panjang leba.

Tambah lo, kecek Garundang, apaknyo dituduah jadi batu. "Padohal cuma jadi kurapa. Nan batu tu kan hitam. Mayik apak ambo kuniang amba, sarupo dindiang ngarai, " bela Garundang.

Malam tadi sudah sumbayang Isya di Musajik Munawarah, Curito Garundang ko disampaian Malanca ka Mak Uniang.

"Ba a lai tu Mak Uniang. Garundang mangecek dalam mimpi jo ambo, apaknyo dizolimi," kecek Malanca.

"Pabia se lah Nca. Mimpi tu bungo lalok mah. Ijan tarok yobana pulo lai. Dunie ko cuma samantaronyo. Ama ibadah sajolah pa banyak," jawek Mak Uniang takaja pulang, sambia masang tarampa.
Malanca tapana....
Penulis Ampera Salim
 
Top