Jikok diinok dimanuangkan, diagak dikanang kanang, urang awak ko yo bana suko barundiang manyari kato sapakat. Mulai masalah remeh temeh sampai ka masalah sagadang gunuang.

Apo lai taradok pamilihan ciek antaro duo, mako musyawarah tatap dikamukokan mambiak kato putuih.
Sarupo Kamih kapatang, sudah sumbayang luhua, tajadi adu pandapek di rumah gadang manantuan, cap, gambar nan kadipakai untuak manapati hari urang surek kaba. HPN bahaso anak nagari. Hari Pers Nasional kapanjangannyo.

Sajak awa tahun lalu, lah banyak usua pandapek nan mantakan gambar untuak kaditatapkan jadi gambar, logo atau maskot kecek urang kini.

Ado nan mausua gambar kabau, ado kudo, ado lo kancia, malah ado pulo nan mintak itiak sarati. Tapi kutiko lah diindang ditampi tareh, lah dipiliah atah ciek ciek, mako kudian inyiak panitia mamiliah duo gambar sajo, yaitu gambar ayam kukuak balenggek jo gambar buruang kuwau.

Bunyi katarangan, kecek Datuak Heranof pucuak pimpinan urang surek kaba, nan tampak khusuak bana mimpin sidang, gambar ayam kukuak balenggek ko diusua dek Datuak Awi dari kaum urang surek kaba sandiri.

Samantaro gambar kuwau diusua dek Datuak Kulin nan anak kamanakan urang rumah gadang.

Alasan Datuak Awi mamiliah ayam kukuak balenggek, karano ayam kukuak balenggek ko haragonyo maha. Urang mamandang suaronyo nan rancak. Dek karano kukuaknyo tu urang tatariak. Biyalah tabali maha.

"Takah tu juwo urang surek kaba. Inyo disagani urang karano suaronyo, tulisannyo. Indak dek karano pangka langannyo nan gadang," kecek Datuak Awi maagiah alasan.

Samantaro Datuak Kulin mamiliah buruang kuwau, karano buruang kuwau ko kini lah sarik basuo. Padohal buruang kuwau ko badiam di bukik barisan nan tabantang di ranah bundo. Kuwau ko tahu bana maagiah padoman takalo ka tajadinyo bancano.

"Duo hari gampo ka tajadi, buruang kuwau lah tahu mah. Ba itu bana santiangnyo kuwau ko," kecek Kulin mampatagak usua.

Datuak Khairul nan dimintak pandapeknyo dek urang banyak, mamuji alasan nan dikamukoan Datuak Awi. Tapi jikok ka mamiliah, kecek baliau tu, inyo tatap mamiliah kuwau.

"Ayam kukuak balenggek tu yo maha. Jikok disamoan ka urang surek kaba, yo tapek bana urang nan diharagoi yo kato katonyo, jo tulisannyo. Tapi ba a ka ba a, buruang kuwau ko pandai maagiah tahu musibah nan ka tajadi. Karano tu ambo mamiliah kuwau," keceknyo. Urang batapuak sabalik. Datuak Awi mangamek. Datuak Kulin tasanyum.

Dalam musyawarah nan balansuang arek arek lungga, ado lo pandapek dari Datuak Eko. Kecek baliau ko, antaro ayam kukuak balenggek jo buruang kuwau, samo samo rancak. Ado kalibahan masiang masiang.

Cuma, kecek Datuak Eko, kok ka dibuek untuak logo, mako bueklah nan agak lawak gambarnyo tu. "Ijan takasan tagang. Kaku. Samantaro salamoko dima sajo, apo sajo gambar maskot tu, tatap agak lawak nampaknyo," saran Datuak nan juwo urang surek kaba tu.

Jikok dirantang amuah panjang, mako dipunta nak nyo singkek. Akianyo disarahan ka pucuak pimpinan rumah gadang salaku silang nan bapangka karajo nan bapokok, untuak mamiliah satu antaro duo.

Kecek urang rumah gadang, samo jo Datuak Eko. Kaduo duonyo, antaro ayam kukuak balenggek jo kuwau samo samo rancak. Hanyo sajo, tasabab nan kadipiliah cuma ciek tando gambar, mako baliau mamutuihkan buruang kuwau.

Kajadian musyawarah ko dicaritoan Malanca ka Mak Uniang pagi tadi, sudah sumbayang subuah di musajik bawah.

"Buruang kuwau nan tapiliah Mak Uniang. Ambo lun ado mancaliak kuwau ko tabang lai Mak. Nan kadok ambo danga kukuak ayam balenggek nyo," kecek Malanca manutuik curito.

"Kuwau tu, kadok sobok dek urang paburu mah, Malanca. Sabab iduiknyo di rimbo," jawek Mak Uniang.

Malanca tamanuang, apo mukasuik kecek Mak Uniang...
 
Top