Sadang lamak minun kawa sudah sumbayang asa hari kapatang. Tibo pasan di WA Mak Uniang. Ruponyo dari Malanca Malin Tuah.

"Iko kawan batanyo Mak. Untuang kok lai kito nan mamakai adat amuah manjawek tanyo kawan ko. Ba iko tanyo baliau:

Manuruik adat awak ko, kok maimbau urang ba a tapak tangan awak, manungkuik atau manilantang?

Ba itu juwo kok maituang jo jari tangan dari maa kito muloi, dari ampu atau dari kalingkiang?

Sudah tu kok mambukak polam/mangga dari maa lo awak mulai, dari tampuak atau dari ikua mangga tuu?

Kok makan di rumah, ba a pulo caronyo, duduak di lapiak atau di kurisi?
Kok minum aia, ba a pulo eloknyo, jo tangan suok atau tangan kida?
Kok sumbayang di maa ancaknyo, di musajik atau di rumah?
Kok makan jo sumando, siapo nan dulu masuah tangan. Awak atau sumando?
Kok makan pisang di alek rami, baa caro makannyo? Patah tigo atau patah ampek?
Kok baralek awak, apo buliah manutuik jalan di muko rumah?
Kok bazakat ba a lazimnyo, ka urang tadakek awak atau ka baznas?
Kok naiak haji, ba a pulo eloknyo, kutiko mudo atau kutiko lah tuwo?
Kok macet di jalan, apokoh awak musti antri di kiri, atau taruih sajo ambiak jalan kanan?

Toloanglah dek mamak mambari jawek. Kato kawan ko, katarangan dari mamak, ka dipakai dalam iduik sahari hari. Siang ka dipatungkek, malam dijadikan pusuang. Tarimokasih dari baliau."

Mancaliak tanyo Malanca sapanjang tali baruak. Mako Mak Uniang ndak mambaleh. Inyo anok sajo.

Sudah tu Malanca Manalepon. "Halo Mak. Mak Uniang ko. Layi sampai pasan ambo. Ko kawan batanyo bana mah Mak!" saru Malanca.

"Yo, Nca. Banyak na nan waang tanyoan mah. Bisuak lah waden jawek yo. Ko kami ka ba domono di lapau simpang haa," jawek Mak Uniang.

"Ko masalah adat ko Mak. Paralu lo dek amak main domino pado managaan adat tu?" tanyo Malanca manajam.

"Eee Malanca. Duduak di lapau ko, baradat juwo ko mah Nca. Jan salah salah waang," jawek Mak Uniang berang.

Samantaro Malanca tangango....
 
Top