Akia akia ko Malanca lah banyak tapakua. Kadok bamanuang pado manggaya. Mangecek sakali sakali bana. Dari pado duduak di lapau bakuncindan baabih hari, ancak bagawua jo induak induak nan sadang marendo, nampak juwo hasianyo. Ba itu pangana Malanca samo surang.

Banyak kato banyak duto. Banyak kecek banyak sasek. Kok sampai pulo salah tulih mancimeeh mahino urang, alamat tangan ka bakabek. Dek itu pulo, Malanca makin tarumuak maukua bayang bayang.

Babuiah bana muncuang maukua laku parangai urang. Nan kasimpulan, awak juwo nan bodoh. Sabab, arato nan tabantang laweh di nagari ko lah dukuasoi dek urang datang. Ba itu ratok Malanca dalam batin.

Dalam ati Malanca, bacampua sagalo raso. Cando bagamuruah layi pulo manahan malu. Ibaratnyo, raso hino lah manggantuang di ubun ubun. Takah awan itam jokilek patuh tungga. Ujan malu ampia maimpok badan diri. Dek itu Malanca acok manyandiri.

Nagari ko ndak bapamatang lai, baitu lamunan Malanca. Lah baladang urang di parak awak. Lah barumah urang di tangah koto. Lah diisi urang tabek awak. Lah dikuasoi urang pantai jo lawik. Tigo rangkiang balirik di halaman lah jadi miliak urang pulo.

Ndak hanyo sakadar itu. Anak urang nan manumpang tu, kapatang lah bacaruik pungkang dalam nagari. Tapi ndak ado nan talok manyapo. Lah dipijak pijaknyo undang nan duo puluah, takah ndak ado nan barani manjinak i.

Basabab kasadonyo ko bisa tajadi, karano pangulu ndak sa andiko, malin ndak sakitab. Ado lo anak nagari bakarajo samo jo urang datang, asa paruik ka kanyang.

Kadicubo pulo dek Malanca marantau ka Madagaskar takah urang nan tibo ka mari, nyato awak ndak tabiaso. Akianyo paik masam raso di nagari ko, samo samo ditanggungan sajo.

Dulu si Ulando, si Patokah, si Anggarai nan bakulik putiah babadan tinggi gadang, lah mangicok manihnyo tanah jawi. Tibo pulo anak Inyiak Matoari nan babadan singkek gampa manyuruah awak karajo rodi.

Kini anak cucu dek dunsanak Inyiak Matoari, lah basikencak pulo di rumah gadang. Dari ilia sampai ka mudiak, lanteh angan sajo inyo manari sambia balari. Nan awak asiak sajo jadi tuli.

Kamanyo ninik mamak urang ampek jinih? Ndak bapumatang sawah ko li? Lah bak jo balam padi rabah. Takah tu turo si Malanca manangisi.

Ndak ka sia raso batin ka dikadukan. Untuang kawan Mak Uniang datang dari subarang, hari Kamih, pakan kapatang. Baliau sangajo datang mahadiri kanduri nikah anak Mak Uniang baralek ketek.

Ungku Malin kampuang Jawo, baitu jamaah mamanggia. Baliau sadarhana sajo. Babaju gamih, bakupiah putiah, itu pakaian sahari hari. Ilimu ugamonyo dalam. Tapi inyo ndak amuah masuak tipi. Karano tu, nan tawu jo baliau urang surau nan sunnah sajo.

Di musajik dakek tanah lapang, sudah mugarik, malam Jumat kapatang, baliau maagiah pangajian. Isi nasihatnyo sangek baguno dek Malanca nan sato mandanga jo kawan kawan.

Kato baliau. Dulu wakatu Bani Israil banyak babuek kamungkaran, Allah Swt. mandatangkan Piraun untuk mamimpin. Kudian tibo Nabi Musa manyuruah umat taat baibadah, akianyo Piraun tumbang sandiri.

Aratinyo, kato baliau, apo nan tajadi di suatu nagari, di dunie ko, itu ulah laku parangai umat nan ado di nagari itu. "Kok taragak nagari awak babuah kabarakahan, mari kito basamo mamelok nagari ko. Molah kito samo samo taat baibadah. Kito jago sumbayang limo wukatu. Kito bayia zakat. Kito jalani puaso. Kok ado pitih kito payi naiak haji," nasihat baliau.

Usah kito maupek, manyaranto, manangih maarang arang ka niniak mamak nan gadang basa batuah. Inyo tu hanyo mukaluak. Ndak ado kuaso apo apo. "Kini kito tunaikan kawajiban kito taradok mukaluak, mintak hak kito kapado Allah. Hanyo Allah nan mambulak baliak an hati manusia," kato baliau.

Dalam ati Malanca bakato, "Pado mangecek baabih hari, maupek baturo turo, ancak marendo sambia manjago wukatu sumbayang."
 
Top