"Ba a jadinyo nan kapatang Mak Uniang," tanyo Malanca ka Mak Uniang di lapau simpang pagi tadi di muko pintu.

"Ndak jadi kami sobok jo Mak Enggi doh," jawek Mak Uniang singkek.

"Ba a kok ndak sobok? Kan layi di rumah Mak Enggi sari kapatang mah," baleh Malanca.

"Pagi pagi yo layi nyo di rumah. Manjalang sumbayang jumat, inyo ka sawah mancaliak tali banda. Inyo turun pintu balakang, lalu ka dapua, lanyok.

"Tuu jo sia anak anak surau to sobok lai?"

"Layi ado Mak Enek,"

"Agak patah sumangek Mak Uniang nampak dek waden," panciang Malanca.

"Indak patah gai sumangek waden doh Malanca. Cuma tapikia dek waden, Mak Enggi ko ruponyo pandeka gadang. Agak tenggi kunfunyo. Salut waden," jawek Mak Uniang.

"Tenggi ba a lo kunfu Enggi tu Mak? Malah kecek urang urang nan datang, inyo panakuik mah. Karano maluncua pintu balakang mailak, mainda dari kajaran anak anak surau tu," baleh Malanca.

"Iyo, Nca. Dipadianyo kami latiah barangik manunggu. Disuruahnyo Mak Enek manarimo kami. Takalo hari lah malam, manjalang lalok, baru inyo manyampaiam salam tarimokasih ka kami.

Disanjuang sanjuangnyo kami. Keceknyo kami pandai manyampaian unek unek. Kami santun bagai katonyo. Kok ado na saketek ribuik sudah isya, itu indak dek kami doh. Itu tukang tukang buek masalah nan biaso sajo tu nyo, kecek baliau," jaleh Mak Uniang.

"Jadi, dek itu Mak Uniang salut ka Mak Enggi," panciang Malanca.

"Iyo Nca. Iyo dek itu."

"Jadi nan si Pekok ba a jadinyo. Kadipabia sajo inyo balapeh arang takah biaso?" tanyo Malanca.

"Alah mah Nca, sukoatinyolah. Kok ka mangecek mangeceklah. Muncuang muncuang inyo. Nan jaleh Enggi bajanji sapangga bulan ko salasai katonyo."

"Yo lah Mak. Mintak katan sapiriang, kopi satangah Mak," kecek Malanca sambia masuak manuju bangku panjang sabalah dindiang tadia lapau Mak Uniang
 
Top