SAJAK daulu urang kampuang kito lah tabiaso maaragoi tamu. Kutiko bacakak badunsanak, inyo imbau tamu untuak manoloang. Akianyo tamu nan jadi tuan rumah. Ba itu bana santiangnyo urang kampuang awak.

Suatu maso daulu, takalo kaum adat tasasak dek kaum paderi, mako urang nan babaju pangulu mintak toloang ka Ulando. Bajapuik bana Simancuang tu ka pulau Cingkuak.

Ikolah kuliah Mak Uniang ka Simalanca sudah sumbayang subuah pagi tadi sapanjang jalan pulang musajik.

Sudah tu, tambah Mak Uniang, ado kisah Bundokanduang duo kali kalah dek Datuak Gamuak dalam parang marabuik kurisi ameh.

Untuak basosoh nan katigo, Bundo langsuang maubungi kawannyo di Himalaya mintak katolongan. Daripado kalah bakapanjangan malawan dunsanak, ancak mintak pelor ka urang lain. Mako tibolah turunan Kubulaikan dari puncak Mongol mambao bantuan bakapa-kapa.

"Katolongan Angku, ndak ka kami lupokan doh Ngku. Beko kok lai manang kami bataruang, kami agiah Ungku tanah saparumahan sarato ladang saamparan, umbuak Bundo nan induak samang Mak Inggih ka Silangkaneh katua kalompok Mongol," kecek Mak Uniang manyambuang curito.

Si Pekok nan dikaja anak anak surau, kecek Mak Uniang lo, tamasuak cucu dek Ungku Mongol. Dek karano itu Mak inggih agak aliak maadok i kalakuannyo. Bukan nyo litak, litak sajo, litak tak nasi ka dimakan. Bukan nyo ilak, ilak sajo, nampak jarek lah dipasangkan.

Satantang karajo Pekok nan kadok mambuek rumik badan Inggih, uleh Mak Uniang, kini lah tibo di ujuang parantian. Ibarat bajalan, lah tibo golek di nan data. Samantang pun baitu, nan anak anak surau manyasak, supayo Pekok dapek jaro.

Mako karano itu, Inggih salaku tatuo nagari, kini kamari bedo. Ka dipabia Pekok bajalan surang, induak samang kok mamburansang. Dikawani Pekok manyubarang, raso ka badan kanai timbang. "Akianyo Inggih mampajaleh bana tampek tagak. Inyo basudi basiasek. Dibueklah patamuan patamuan jo anak nagari, supayo urusan Pekok ndak disabuik layi," tutuik Mak Uniang mamutuih hikayat.

Malanca panasaran, "Tuuu baa lai Mak?" tanyo Malanca mintak sambuang. "Iko sajolah dulu yo Malanca. Untuak manaruih an nyo, bayia uang sikola ka waden dulu dih," jawek Mak Uniang sambia malucuih ka rumahnyo.

Malanca tangango.....
 
Top